Nun moderno edificio situado na fronte marítima de San Uxía de Ribeira emerxe a praza de abastos municipal. O proxecto naceu coa firme intención de que este mercado exercera de motor comercial e social da vila. Na planta baixa operan máis dunha vintena de postos de pescado, carne, froitas e conxelados. O segundo piso ideouse para a venda de produtos non perecedoiros. As plantas superiores deseñáronse para actividades complementarias e xa acolleron un innovador programa de dinamización xuvenil impulsado polo Concello. Ten unha ampla terraza aberta que permite gozar dunhas excelentes vistas da Ría da Arousa.