Segundo informan en case todos os centros educativos do municipio, dun xeito ou outro, reducíronse o número e as horas do profesorado de Pedagoxía Terapéutica, Audición e Lingua e, coidadores e profesorado de apoio. Sumado á recuperación das merecidas horas de libre disposición dos docentes, diminúe aínda máis o número de apoios nas aulas.

O manifesto redactouse de forma conxunta polas ANPAS do CEIP de Palmeira, “A Gándara” do CEIP de Artes, “Monte Tahume” CEIP de Olveira, CEIP de Frións, “Santa Uxía” do CEIP O Grupo, EEI de Deán Grande e do “Caramecheiro” IES Nº1 de Ribeira; cuxa presidenta, Paz González é tamén voceira nesta xuntanza.

Na convocatoria, a representante das ANPA, Paz González, presentou o manifesto e xunto cos seus compañeiros, mostraron o seu malestar e tamén anunciaron as futuras liñas de acción para que se lles atenda as súas demandas.

O acto contou co apoio do Goberno local de Ribeira representado polo rexedor, Luís Pérez, o segundo tenente de alcalde, Francisco Suárez-Puerta, a concelleira de Educación, Cruz Rivadulla, a concelleira de Facenda, Herminia Pouso, a conselleira de Servizos Municipais, Tania Redondo, a concelleira de Cultura, Antía Alberte, o concelleiro de Mar, Fernando Abraldes e a concelleira de Promoción Económica, Veva Betanzos.

O rexedor mostrou todo o seu apoio e engadiu que “chove sobre mollado; xa no ano 2022 a consellería de Educación aplicou un recorte de 12 profesores no Instituto Nº1, tamén nos últimos anos reduciuse unha aula no CEIP de Palmeira e un longo etcétera, polo tanto, isto segue un camiño de constante deterioro do Ensino público”. Dende oGoberno local de Ribeira manifestan  o seu apoio á comunidade educativa de Ribeira, “contan co noso respaldo e imos pedirlle á Consellaría de Educación que atenda as demandas e dote profesorado suficiente os centros educativos para que a rapazada teña una educación de calidade”