Boiro, 18 de marzo de 2025.

Esta mañá os alcaldes da mancomunidade Barbanza Arousa, Julián Bustelo, José Ramón Romero, José Carlos Vidal e Luis Pérez Barral ofreceron unha rolda de prensa conxunta na que mostraron a seu total rexeitamento ao proxecto de Altri que tal como indicaron “supón un impacto directo na Rede Natura 2000, que ameaza flora e fauna endémicas, que pon en risco o consumo de auga da poboación e industria da Barbanza e cuxas verteduras de augas residuais ao río Ulla poderían poñer en risco o sector do mar da ría de Arousa”.

Esta é a segunda ocasión na que os alcaldes se unen en contra deste proxecto, contra o que xa hai un ano  presentaron alegacións argumentando o seu previsible impacto nun entorno xa moi deteriorado como é o río Ulla, do que depende o abastecemento de auga dos municipios deste territorio e a ría de Arousa.

Nesta rolda de prensa, os alcaldes ofreceron algúns datos do posible impacto que este modelo industrial tería na comarca. Destacaron a importancia do sector primario do mar como un sector estratéxico para a economía local, do que dependen un importante número de familias en cada un dos concellos que poderían verse en risco ao comprometerse a calidade das augas do río Ulla, o máis determinante para a súa produtividade marisqueira por ser o máis caudaloso dos que alimentan a ría de Arousa, así como o impacto ambiental e os riscos no abastecemento de auga potable da poboación.

Os alcaldes remataron a súa exposición pública facendo un chamamento a participar na mobilización convocada para o vindeiro día 22 de marzo convocada pola Plataforma en Defensa da Ría de Arousa e instan á Xunta de Galicia a velar polos intereses dos municipios que dependen do río Ulla e da ría de Arousa.