Da man da concelleira de Medio Ambiente, Antía Alberte e do concelleiro de Mar, Fernando Abraldes presentouse esta iniciativa nunha praia de Río-Azor en marea baixa e chea de argazo e plásticos.

Nestes días de temporais onde o mar devolve á terra todo o lixo xerado pola diferentes actividades humanas alén dos nutrientes tan necesarios para a dinámica de toda a cadea trófica, o Concello de Ribeira quere abordar esta situación non só dende o servizo municipal de limpeza senón tamén facendo actividades de concienciación e divulgación “e que mellor maneira que os propios concelleiros nos involucremos nestas limpezas voluntarias, comezamos o ano pasado con estas iniciativas e continuamos con elas. A acción de limpeza desenvolverase o vindeiro sábado 26 de outubro ás 11:00 horas sempre que o tempo nos acompañe” sinalou Antía.

O punto de encontro será na praia de Río-Azor e farase a limpeza da mesma así como nas calas contiguas cara o norte, as chamadas praias caninas habilitadas polo Concello sitas entre Punta Aguiúncho e a Pedra da Igrexa dos Mouros. “Aínda que son praias pequenas son espazos onde se acumula moito material plástico entre as rochas e pensamos que é importante traballar nas rochas polo efecto acumulativo” salientou a concelleira.

Finalmente animou a todos e a todas a participar e informou que “ademais de facer a limpeza de proporcionar luvas e bolsas, teremos despois un pequeno coloquio de concienciación ambiental.

Abraldes fixo unha chamada ao voluntariado a sumarse para a limpeza de praias para o sábado 26, falou do importante que é para o sector do mar “agora que estamos nas primeiras maruxías do ano, é o momento preciso para facer esta actividade de limpeza xa que no verán o mar está moi en calma pero cando chegan estas temporais o mar devolve todas estas variedades de plásticos que co tempo se volven en micro-plásticos co problema de chegar á cadea trófica”finalizou o concelleiro de Mar.