Ribeira 5 de setembro
Na mañá de hoxe presentouse este novo concurso en homenaxe á profesora Montse Noya Vázquez da man da concelleira de Educación, Cruz Rivadulla máis as docentes do CPR Galaxia: Eugenia Garrido, Beatriz Paz, Lola Pérez e Marta Diz.
O alumnado de todos os centros de ensino de Ribeira teñen unha cita coa expresión plástica neste novo certame o I Concurso de debuxo e pintura Montse Noya Vázquez convocado polo CPR Galaxia e o Concello de Ribeira. O Concello apoia a convocatoria para chegar a todos os recunchos de Ribeira e conmemorar a memoria de
Montse Noya como representante de todas as persoas que exercen o maxisterio, a conmemoración do recoñecemento do traballo incansable dos mestres e mestras e a honra da súa memoria.
En palabras do CPR Galaxia esta é a proposta:
Dende o Colexio Galaxia queremos organizar este concurso como homenaxe á nosa querida compañeira Montse Noya Vázquez, que nos deixou de xeito inesperado e á que botaremos sempre en falta. Cos seus murais, enchía o noso colexio e os nosos corazóns de creatividade. Por iso, desexamos compartir e continuar o seu labor transmitindo esa ilusión e facendo partícipes a todos os centros de ensino do concello.
